ACTA DA SESIÓN ORDINARIA DO PLENO DA
CORPORACIÓN REALIZADA O 27 DE NOVEMBRO DE 2013.
No salón de sesións da Casa do
Concello de Cabanas, sendo as dezanove horas e trinta minutos do día
vinte e sete de novembro de dous mil trece, en primeira convocatoria
e baixo a presidencia do Sr. Alcalde D.Germán Castrillón Permuy,
coa asistencia dos Sres. Concelleiros relacionados á marxe e do
Secretario titular D. Antonio López Vila, reúnese o Pleno da
Corporación en sesión extraordinaria de acordo coa correspondente
convocatoria.
Concelleiros asistentes: Da. Eva Ma. Pazos Bande, Da. Esperanza
Gayoso Pereiro, D. Juan Antonio López Rodriguez, Da. Ana Rosa Méndez
EiroaD. José C. Rey García D. Luis A. Fachal López
D. Delfin Feal Pereira
Da. Ma. Teresa de Jesus García Pita e D. Angel Pena Fontenla
Unha vez comprobada a existencia de
quórum para a válida constitución do Pleno, a Presidencia declara
aberta e pública a sesión, procedéndose a trata-los asuntos
incluídos na Orde do Día.
Non asiste o concelleiro D. Julian
Ramón Seijas Criado.
PARTE RESOLUTIVA.
1.- ACTAS DE SESIÓNS ANTERIORES. Dáse
conta das actas das sesións anteriores realizadas os días 25 e 30
de setembro e 15 de novembro de 2013, das cales entregouse copia coa
convocatoria a tódolos concelleiros, despois de preguntar o Sr.
Presidente se algún membro da Corporación ten que formular algunha
observación, manifestando o Sr. Pena Fontenla que no punto 5 da
sesión do 15 de novembro o voto dos concelleiros non adscritos fora
a abstención, despois de emendar o erro de transcrición, o Pleno da
Corporación en votación ordinaria, co voto a favor dos membros
presentes acorda aproba-las referidas actas.
2.- PROPOSTA OBRAS POS 2014. Vista a
circular da Deputación Provincial da data 28 outubro de 2013
comunicando a aprobación das bases reguladoras do Plan Provincial de
Cooperación ás Obras e Servizos de competencia municipal (POS
2014), así como, a contía asignada a este Concello; vistas as
devanditas bases reguladoras publicadas no Boletín Oficial da
Provincia número 206 de data 29 de outubro de 2013, así como o
proxecto técnico da obra a propoñer.
Despois de debatido o asunto, o pleno
da Corporación en votación ordinaria, co voto a favor dos dez
membros presentes, acorda:
1.-
Aprobar o Plan provincial de cooperación ás obras e servizos de
competencia municipal (POS) 2014, cuxas bases se coñecen a aceptan
na súa totalidade, no que se recollen as obras que o Concello ten
previsto realizar, ou a dedicación a gastos correntes do exercicio
2014 ou a amortización anticipada da débeda, e de acordo co
financiamento que se indica:
A
) Realización de obras e subministracións:
Denominación
da obra
|
Deputación
|
Concello
|
Presuposto
total
|
Saneamento
de augas residuais en Chao da Aldea
|
56.841,30
|
---
|
56.841,30
|
Subtotal
obras
|
56.841,30
|
---
|
56.841,30
|
Aprobar
os proxectos das obras incluídas na anualidade 2014 e que se
relacionan nesta táboa.
B)
Financiamento de gastos correntes ou amortización de débeda:
Deputación
|
|
Achega
provincial aplicada ao financiamento de gastos correntes
|
81.085,06
|
C)
Resumo:
Denominación
da obra
|
Deputación
|
Concello
|
Presuposto
total
|
SUBTOTAL
OBRAS
|
56.841,30
|
----
|
56.841,30
|
SUBTOTAL
GASTOS CORRENTES
|
81.085,06
|
----
|
81.085,06
|
TOTAL
|
137.926,36
|
----
|
137.926,36
|
2.-
Aprobar o Plan complementario do ano 2014 no que se inclúen as obras
que a continuación se indican e aprobar os correspondentes
proxectos:
Denominación
da obra
|
Presuposto
|
Non
se formula proposta para o plan complementario
|
---
|
TOTAIS
|
---
|
3.-
Declarar que o Concello ten a dispoñibilidade dos terreos, augas e
servidumes para a execución das obras, e ten resolto o relacionado
coas concesións e autorizacións administrativas que legalmente
sexan necesarias.
4.-
Comprometerse o Concello a incluír no orzamento municipal do 2014 os
fondos necesarios para facer fronte á achega municipal das obras
incluídas na anualidade do 2014 se ahoubera.
5.-
Solicitar da Deputación Provincial da Coruña, a delegación neste
Concello da contratación e execución das obras incluídas no plan,
que se entenderá aceptada si esta prodúcese efectivamente.
6.-
Declarar que o concello non solicitou nin percibiu ningunha
subvención doutras administracións públicas para o financiamento
do investimento ou, no caso de que existan axudas ou subvencións
concorrentes doutras administracións para a súa execución,
achégase o detalle de cada unha delas, acreditándose que a súa
suma total non supera o 100% do seu importe.
7.-
Autorizase á Deputación a obter as certificacións da Axencia
Estatal de Administración Tributaria e da Tesourería da Seguridade
Social nas que se acredite que o concello está ao corrente nas súas
obrigas tributarias e coa Seguridade Social
8.-
Facultar expresamente ao alcalde para todo o relacionado coa
tramitación e xestión do presente acordo e o correspondente
expediente.
3.- DECLARACIÓN INSTITUCIONAL DE APOIO
Á SEMANA SANTA FERROLANA. A continuación dáse conta da seguinte
proposta de declaración institucional: O Concello de Ferrol, en
colaboración coa Coordinadora de Cofradías da Semana Santa
Ferrolana, está traballando para que a súa Semana Santa sexa
declarada Festa de Interese Turístico Internacional.
O carácter eminentemente relixioso
desta conmemoración unido á enorme transcendencia que ten para a
promoción social, cultural e turística do Concello de Ferrol e da
súa comarca fai posible que cada ano veñan milleiros de persoas de
diferentes lugares para contemplar as procesións que rememoran a
Paixón, Morte e Resurrección de Xesús.
Durante unhas semanas as rúas de
Ferrol énchense arredor dos pasos das cinco cofradías, herdeiras
dunha tradición secular e dun espírito de fondo calado popular que
resiste ós cambios sociais e xeneracionais.
Por todo o anteriormente exposto, dende
o Pleno do Concello de Cabanas queremos expresar o noso apoio para a
declaración da Semana Santa Ferrolana como Festa de Interesa
Turístico Internacional.
Na deliberación do asunto prodúcense
as intervencións coas opinións que de forma sintetizada se recollen
a continuación:
Polo grupo Mixto: o concelleiro do
PSdG-PSOE D. Delfín Feal Pereira non ten que obxectar en canto a que
se trata dunha promoción do turismo, pero non estaría de máis
potenciar a semana santa aresana e tamén a que se está facendo aquí
coas alfombras frorais, incluír todo como de interese
turístico-relixioso.
O Sr. Alcalde indica que a Semana Santa
de Ferrol é unha tradición, solicitan apoio e considera que é
positivo para a Comarca, si Ares o pide tamén se apoiará e en
Cabanas van a seguir coa promoción ano tras ano.
Despois
de debatido o asunto, o pleno da Corporación en votación ordinaria,
con oito votos a favor dos membros do grupo popular,
da concelleira Dª. Mª. Teresa
de Jesús García Pita, do concelleiro D. Angel Pena Fontenla, e do
concelleiro do PSdG-PSOE do grupo mixto, e dúas abstencións dos
membros do grupo AEC, acorda:
Aproba-la mencionada declaración
institucional de apoio a Semana Santa Ferrolana.
4.- DECLARACIÓN INSTITUCIONAL DÍA
INTERNACIONAL PARA A ELIMINACIÓN DA VIOLENCIA DE XÉNERO. Vista a
proposta de declaración institucional do grupo popular que di: Con
motivo do Día internacional para a eliminación da violencia contra
a muller, o Concello de Cabanas manifesta o seu máis profundo
rexeitamento a calquera forma de violencia exercida contra as
mulleres.
A violencia, que nas súas distintas
formas se exerce contra as mulleres, constitúe a mais clara
manifestación das desigualdades que persisten entre mulleres e
homes, constituíndo un atentado contra o dereito á vida, á
seguridade e á liberdade, á dignidade e á integridade física e
psíquica das vítimas e, polo tanto, un obstáculo para
desenvolvemento dunha sociedade máis xusta e igualitaria.
As situacións de violencia de xénero
requiren unha resposta coordinada, eficaz e interdisciplinar por
parte das distintas administracións.
A través da mellora da coordinación
interinstitucional e da garantía dos dereitos que o noso ordenamento
xurídico recoñece ás vítimas e aos seus fillos e fillas,
preténdese alcanzar unha resposta máis eficaz, centrada na
prevención da violencia de xénero, unha mellor protección das
mulleres e dos seus fillos e fillas e unha atención personalizada
que contribúa á súa recuperación integral.
Por iso, resulta imprescindible xuntar
todos os esforzos para facer fronte a este grave problema público e
social, apelando á unidade de todas as forzas políticas e das
Administracións Públicas, contando coa implicación da sociedade no
seu conxunto e apoiando o labor das organizacións especializadas da
sociedade civil.
Consciente da necesidade de seguir
avanzando neste ámbito, o Concello de Cabanas reitera o seu
compromiso co obxectivo de alcanzar unha sociedade libre de violencia
na que as mulleres gocen da dignidade e os dereitos que lles son
inherentes, como corresponde a unha sociedade libre e democrática.
Na deliberación do asunto prodúcense
as intervencións coas opinións que de forma sintetizada se recollen
a continuación:
A concelleira Dª. Mª. Teresa de Jesús
García Pita fala de incoherencia, estase a tratar da eliminación da
violencia contra as mulleres e pregúntalles si realmente saben diso,
estase a falar de mortes, de poñer á muller no sitio que lle
corresponde, de ampliar dereitos e por outro lado vostedes están
recortando, impedindo que a muller dispoña do seu corpo, recortes en
sanidade, recortes en xustiza, etc., non é desculpa que estamos en
crise para facer estes recortes e logo incrementan as porcentaxes nas
concesións de autoestradas, paseos marítimos na Coruña,
subvencións Deputación, subvención de ensinos que discriminan por
sexo, hai unha incoherencia e pregúntase si realmente se sabe do que
se está a falar.
Polo grupo Mixto: o concelleiro do
PSdG-PSOE D. Delfín Feal Pereira considera que a loita contra a
violencia de xénero non entende de recortes e supón un obxectivo
que todo goberno debe ter como prioritario nas súas políticas, así
o fixo o partido socialista impulsando leis a prol da igualdade,
contra a discriminación, e loita pola erradicación desta violencia
tanto física como psicolóxica; fala da repercusión da violencia
na familia chegando a perda da vida de moitas mulleres, o que debe
facer reflexionar sobre as políticas que se están a desenvolver,
alude aos recortes do partido popular no eido social, sanitario,
educativo e loita contra a violencia de xénero, redución do
orzamento para este concepto na Delegación do Goberno, o número de
vítimas no que vai de ano, recortes nas axudas as Comunidade
Autónomas onde a de Galicia lonxe de suplir a redución estatal
aplica o maior recorte en igualdade dende 2009, merecendo especial
atención a prevención e actuación en ámbitos de maior
vulnerabilidade; refírese ao incremento da violencia na adolescencia
despois da reforma educativa que suprime a educación para a
cidadanía que era clave para a prevención, fai mención a redución
das partidas orzamentarias en políticas de prevención polo partido
popular tanto no goberno central coma na Xunta e o papel determinante
das accións dos centros de información das entidades locais nos
casos de violencia de xénero, están en contra da violencia de
xénero pero as palabras por si solas non bastan hai que acompañar
de recursos.
Polo grupo Popular: a portavoz Dª. Eva
Mª. Pazos Bande, manifesta que non van polemizar con discursos
sobre este tema que consideran de moita importancia; o Concello de
Cabanas está a facer todo o que se pode nos casos que se presentan
no Concello, teñen blindado os servizos sociais nos orzamentos,
están atendendo tódalas situacións que o requiren; aparte da
declaración institucional dende o Concello promovéronse actos para
a celebración do día internacional para a eliminación da violencia
de xénero, fíxose programa de envellecemento activo dedicado a este
tema buscando promover a corresponsabilidade en persoas maiores,
tamén houbo actuación de conta contos no colexio para educar as
novas xeracións na igualdade e romper con estereotipos de xénero
que inda continúan na sociedade, non solo palabras hai que facer
cousas e dende o Concello farase todo que sexa posible.
A Sra. García Pita opina que hai
discrepancia no PP entre o que pensan facer aquí e o que lle mandan
no partido, sublévalle que unha muller diga o que dixo a portavoz
popular, que poida ler un planfeto que lle mandou o partido inda que
saiba que é incoherente, falso e cheo de mentiras e logo no concello
faga outra cousa, e sabe a quen ten que pedir que cambien as leis e
segan evolucionando nos dereitos das mulleres que custou moitas vidas
e sufrimentos, alegrase que polo menos no pobo pense outra cousa.
O Sr. Feal Pereira alégrase que se
intente educar aos máis pequenos inda que a maiores está o problema
económico, si queremos que se eduquen en igualdade hai que loitar
contra a violencia de xénero e demandar do Estado e da Xunta
partidas económicas, esixir que se manteñan e potencien as accións
de actuación e prevención, que o Goberno central modifique a
reforma local e devolva competencias e recursos económicos as
entidades locais, sobre todo demandar que o Ministerio de Educación
non suprima educación para a cidadanía como ferramenta para educar
en igualdade achegando as partidas necesarias para desenvolvemento
dos ciclos formativos, e poñer os cementos para a loita contra a
violencia de xénero.
A Sra. Pazos Bande insiste en non
polemizar sobre este asunto, pódese chegar ao que é de competencia
local, como equipo de goberno tratan de conseguir os recursos
necesarios para abordar os asuntos sociais que teñan que ver co
Concello, non poden actuar en Madrid o na Xunta, a obriga e conseguir
fondos para cubrir os servizos sociais e ata o momento o están
conseguindo.
O Sr.Alcalde considera que a veces o
orzamento non é todo, pois con menos orzamento e unha boa xestión
se poden facer máis cousas, ademais dende a Dirección Xeral de
Igualdade se están facendo cousas moi importantes neste campo.
Despois
de debatido o asunto, o pleno da Corporación en votación ordinaria,
co voto a favor dos dez membros presentes acorda aproba-la mencionada
declaración institucional.
5.- MOCIÓNS DO GRUPO MIXTO E DOS
CONCELLEIROS NON ADSCRITOS SOBRE INCREMENTO CANON TRATAMENTO RESIDUOS
URBANOS A PERCIBIR POR SOGAMA. A continuación trátase en conxunto
as mocións presentadas polos grupos: Mixto e Concelleiros non
adscritos, sobre a violencia de xénero.
A) A moción presentada polo grupo
Mixto, na exposición de motivos fala do proxecto de Lei de
Orzamentos da Comunidade Autónoma de Galicia paa 2014 que na DA
21ª,dous, pretende a revisión do canon a percibir por Sogama S.A.
pasando a 74,64 €/Tn, máis o ive, cando na actualidade é de 55,91
€/Tn, máis ive., xustificando o incremento na caída das primas
estatais pola valoración enerxética dos residuos, segundo decisión
do Goberno Rajoy. Co novo canon Sogama pasaría de ter perdas en
2013 a uns beneficios de 6.624.160 € en 2014.
Estiman que non resulta aceptable que
unha sociedade do sector público autonómico como é Sogama, na que
a Xunta ten o 51% do capital social, se plantee en tempo de crise
con afán recadatorio non só cubrir costos senón xerar beneficios
inxustificados detraídos dos petos dos cidadáns, cando os concellos
se atopan en situación delicada; a Xunta en vez de demandar
compensación do Goberno central polos recortes nas primas de
coxeneración eléctrica opta por incrementar o canon obrigando aos
concellos a suba do canon aos veciños sen a máis mínima
sensibilidade social, consideran que debe afrontarse a situación con
diálogo e respecto aos poderes locais representados na Fegamp.
Por to o exposto, somete a
consideración do Pleno a adopción dos seguintes acordos:
1º. Demandar ó Presidente da Xunta de
Galicia a urxente retirada da proposta de incremento do canon por
tratamento de residuos, recollida na Disposición Adicional 2ª,
Dous, do proxecto de Lei de Orzamentos Xerais da Comunidade Autónoma
de Galicia para o ano 2014.
2º. Demandar ó Presidente da Xunta de
Galicia e ó Presidente da Federación Galega de Municipios e
Provincias a creación e posta en marcha dunha mesa de negociación,
na que, coa presenza e colaboración de Sogama, se estuden os custos
reais do tratamento de residuos dos concellos.
3º. Dirixirse a todos os Grupos
políticos, con representación no Parlamento de Galicia, a fin de
que requiran da Xunta de Galicia a realización dunha auditoría
externa (económico financeira, recursos humanos, produción, medio
ambiental, etc. ) da Sociedade Galega de Medio Ambiente, dándose
traslado dos seus resultados á totalidade dos concellos que utilicen
os seus servicios.
4º. Demandar do Presidente da Xunta de
Galicia que, para o caso de que non se retire a iniciativa da nova
tarifa do canon de tratamento de residuos dos orzamentos autonómicos
do 2014, o incremento que sufra o mesmo respecto ó do ano 2013 sexa
asumido integramente polo Goberno autonómico, sen repercusión
algunha nas transferencias ós concellos.
B) A moción presentada polos
concelleiros non adscritos Dª. Mª. Teresa de Jesús García Pita e
D. Angel Pena Fontenla alude a Lei 10/1997, do 22 de agosto, de
residuos sólidos urbanos de Galicia e ao Plan de xestión dos
residuos sólidos urbanos de Galicia, que atribúen a condición de
xestor a SOGAMA, e a Xunta gobernada polo PP incrementa nos
orzamentos para 2014 un 34% o canon do lixo pasando de 55,91 a 74,54
sen ter en conta o ive. Esta decisión vén imposta polo cambio de
tarificación eléctrica do goberno central que tamén afecta a
Megasa, con elo SOGAMA pretende consolidar a conta da cidadanía 7
millóns de euros de beneficio. Á vista do novo saqueo da cidadanía
apostan por priorizar reciclaxe e compostaxe, dende o municipio hai
que puxar por tratamentos ecolóxicos e corrixir a recollida sen
separar, tratando de reverter custos de tratamento na propia
localidade con creación de emprego e conxelación de taxas.
Por todo elo, solicitan do Pleno da
Corporación a adopción do seguinte acordo:
1. Instar á Xunta de Galicia, aos
grupos parlamentarios do Hórreo e á FEGAMP a pular pola derrogación
do incremento previsto do canon de SOGAMA que deben satisfacer os
concellos.
2. Instar á Xunta de Galicia a
derrogar o Plan de Xestión de Residuos Urbanos de Galicia 2010-2020
e crear un modelo de xestión local de reciclaxe e compostaxe, para
impulsar a creación de emprego.
3. Instar ao goberno local de Cabanas a
derrogar o incremento da taxa do lixo sobre os seus veciños e
veciñas.
Na deliberación do asunto prodúcense
as intervencións coas opinións que de forma sintetizada se recollen
a continuación:
Polo grupo AEC: o portavoz D. Luis A.
Fachal López solicita que as dúas mocións se voten por separado. O
Sr. Presidente indica que non hai problema.
Polo grupo Popular: a portavoz Dª. Eva
Mª. Pazos Bande considera que é un tema que se tratou en varias
reunións, o equipo de goberno non está de acordo coa subida de
Sogama pero revelarse contra o pago implicaría non percibir achega
do Fondo de Cooperación da Xunta co cal non están de acordo, como
oposición poden dicir moitas cousas pero como equipo de goberno
teñen que ter outra responsabilidade, hai que dar cobertura a este
servizo e asumir a subida, hai que executar as sentenzas do Penso que
impiden que se poida asumir esta subida, polo tanto como xa dixeron
noutras reunións hai que subir o recibo, aclara tamén que a pesar
desta subida seguimos estando nos prezos máis baixos dos concellos
do entorno, aludindo as taxas dos distintos concellos, a idea do
equipo de goberno era unha pequena suba para reducir déficit,
insiste nos gastos da execución da sentenza do Penso e no informe de
Intervención sobre o déficit do servizo, así como que o equipo de
goberno ten que actuar con responsabilidade.
A Sra. García Pita sinala que en
ningún momento pediron que o concello asuma a subida, senón que
impida esa suba de Sogama, porque unha cousa é que cubra custos pero
que tomen o pelo non, non se pode consentir esa actitude monopolista,
na UE están prohibidos estes sistemas empresariais, o cidadán non
ten porque sufrir a incompetencia e falta de gobernabilidade dun
partido político.
D. Luis A. Fachal López portavoz do
grupo AEC opina que todos están de acordo en que a subida de Sogama
é inxusta, polo tanto non ve inconveniente en asumir todos a
proposta do concelleiro do PSdG-PSOE que demanda que non se aplique
porque é inxusta, a proposta de Anova ten unha diferenza no punto 3
que non respectaría o informe de Intervención, a Xunta é quen ten
a potestade pois xuntémonos todos e reclamemos todos xuntos a mesma
proposta.
O Sr. Feal Pereira alude a intervención
da portavoz popular indicando que o debate das taxas do lizo xa
quedou debatido no pleno anterior, isto é outra cousa, é unha
subida unilateral e inda por encima pasa a un superávit de máis de
6 millóns de euros, non ve inconveniente en que se demande da Xunta
a retirada, que se negocie coa Fegamp e Sogama e de unha cumprida
información sobre a xestión económico-financeira, caso de non
retirala que asuman a subida xa que o 51% é a coparticipación da
Xunta na empresa e seguir traballando na reciclaxe, educación, etc.,
a comparación de concellos hai que facela con outros nas mesmas
condicións, o da sentenza do Penso é como botarlle a culpa a todo
porque non sabemos que facer, no debate da suba da taxa quedou claro
a postura deste portavoz e como se podía reducir custos sen esperar
ao punto limpo, actualizar o padrón contribuíntes está ben pero as
Tn seguen a ser as mesmas, pero nesta moción non se está a falar
das taxas, trátase de esixir a Sogama a través da Xunta de Galicia
e da súa Consellería que estude esta suba e non se aplique, faltan
moitos datos a estudar.
A Sra. Pazos Bande indica que as dúas
fontes de financiamento de Sogama son o canon que cobra aos concellos
e a venda de enerxía eléctrica, o novo marco regulador do sector
eléctrico prevé un imposto do 7% e a diminución de primas, os
cambios lexislativos levan a un panorama complexo para a economía de
Sogama, ante isto a dirección da empresa tomou máis medidas como
venda de vidro e aceiro, etc., co incremento do canon a empresa
garante a súa viabilidade e prestación dun servizo público
esencial para os Concellos, que a Xunta creou no seu día con
carácter voluntario; Sogama non repartiu dividendos nestes últimos
anos, foron para reservas mentres que en 2006 e 2007 si os
repartiron, gastaron o que non tiñan e agora pagamos as
consecuencias, a pesar da subida as tarifas de Sogama seguen a ser
das máis baixas, non está de acordo en non pagar, (intervén a Sra.
García Pita e a Presidencia ordénalle silencio) a UE nun informe
dunha consultora externa cualificaba a actividade de Sogama de
interese xeral e que o canon dos concellos era insuficiente para a
súa viabilidade, polas particularidades de Galicia os custos de
tratamento son máis caros que noutras Comunidades, e as contas son
auditadas anualmente e son públicas.
O Sr.Alcalde aclara que a Fegamp segue
coas conversacións, temos que ter responsabilidade como equipo de
goberno e gobernar, non se pode facer algo que dentro de certo tempo
custe moito diñeiro, agora hai que acometer a demolición do Penso,
recorda tamén que Sogama non pode recibir subvencións e a Xunta non
pode asumir a suba.
Despois de asumir os concelleiros non
adscritos que a súa moción quede asumida pola do grupo Mixto, o Sr.
Presidente somete a votación a moción presentada polo concelleiro
do PSdG-PSOE do grupo Mixto, resultando cinco votos a favor dos
membros do grupo AEC, do concelleiro do PSdG-PSOE do grupo mixto, da
concelleira Dª. Mª. Teresa de Jesús García Pita, e do concelleiro
D. Angel Pena Fontenla, e cinco en contra dos membros do grupo
popular; visto que se produce empate repítese a votación obténdose
o mesmo resultado, a vista do cal o Sr.Presidente co voto de calidade
decide a favor do rexeitamento da devandita moción.
6.- MOCIÓN DO GRUPO MIXTO SOBRE A NON
APLICACIÓN NA COMUNIDADE AUTÓNOMA DE GALICIA DA RESOLUCIÓN QUE
IMPLANTA O REPAGO DOS MEDICAMENTOS DE FARMACIA HOSPITALARIA. Vista a
moción presentada polo concelleiro do PSdG-PSOE do grupo Mixto en
cuxa exposición de motivos alude a posta en marcha do Real
Decreto-Lei 16/2012, do 20 de abril de medidas urxentes para a
sostibilidade do Sistema Nacional de Saúde e os pasos dados pola
administración en contra dos dereitos dos doentes. Unha das medidas
máis importantes foi a obrigatoriedade de cofinanciar o custo dos
medicamentos polos pensionistas, engadiuse a exclusión de máis de
400 fármacos da lista de medicamentos financiados que multiplicaron
o seu custo, os salarios e as pensións en Galicia son dos máis
baixos do Estado; estas medidas sumadas a outras antisociais
aplicadas polos gobernos de Rajoy e de Feijo cunha nefasta xestión e
complicidade están a empeorar a calidade de vida e empeorar as
desigualdades sociais.
Os concellos galegos son dos que teñen
máis poboación envellecida, máis pensionistas e enfermos crónicos
e polo tanto máis afectada tendo en conta a subida do ive, IRPF,
transporte, auga, etc, con pensións que non superan 600 euros en
moitos casos. A medida de repago non reduciu o gasto farmacéutico
pero aumentou o dos cidadáns e no BOE do 19 de setembro publícase
Resolución pola que se modifican as condicións de financiamento de
medicamentos incluídos na prestación farmacéutica como feito
consumado, afectando a prestación farmacéutica ambulatoria nos
hospitais, non se trata de aportación reducida como di o PP, trátase
de medidas inxustas e de crueldade por aplicarse aos pacientes máis
graves. Hai moitas asociacións e colectivos sanitarios que elevaron
protesta á administración e Comunidades Autónomas que amosaron a
súa incomprensión, en Galicia o Sr. Feijóo ten anunciado a súa
aplicación e significa un novo imposto aos máis enfermos. Un
dereito como é o da saúde non pode converterse nun privilexio.
Por todo elo somete a consideración do
Pleno a adopción dos seguintes acordos:
1º. Que este Concello solicite do
Goberno Galego a NON aplicación na CC.AA. de Galicia da Resolución
do 10 de setembro que implanta o repago na dispensación ambulatoria
dos medicamentos de farmacia hospitalaria indicados para tratamento
de graves patoloxías e de doenzas crónicas.
2º. Instar á Xunta de Galicia a
demandar do Goberno central a retirada da Resolución do 10 de
setembro de 2013,da Dirección General de Cartera Básica de
Servicios del Sistema Nacional de Salud y Farmacia.
Na deliberación do asunto prodúcense
as intervencións coas opinións que de forma sintetizada se recollen
a continuación:
Polo grupo Popular: a portavoz Dª. Eva
Mª. Pazos Bande manifesta que a achega do usuario non é unha
novidade, o novo modelo está no Real Decreto Lei 16/2012, do 20 de
abril, que introduce criterios de equidade que demandan os cidadáns,
eficiencia que esixe o tribunal de contas e seguridade que demanda o
sector sanitario, polo tanto a achega de usuarios en fármacos de
dispensación na farmacia hospitalaria non é novidade, forman parte
da prestación farmacéutica do mesmo xeito que nunha oficina de
farmacia, é unha achega reducida do 10% cun tope de 4,20 € envase,
os topes mensuais son únicos, os usuarios exentos na oficina de
farmacia tamén o estarán na farmacia hospitalaria; é norma básica
impulsada polo Ministerio de Sanidade e polo tanto de obrigado
cumprimento, actualmente en Galicia estase traballando para a entrada
en vigor a aplicación deste modelo.
A Sra. García Pita considera que
sempre están co mesmo argumento de que é unha medida do goberno
central, o goberno local non pinta nada porque son serviles e nada
máis; chámalle a atención que a portavoz popular non senta repulsa
por dicir que inda lle parece pouco o que teñen que pagar os
pacientes, non sabe como está a situación dos pensionistas.
O Sr. Feal Pereira considera unha pena
que nun punto esencial da vida das persoas como é a saúde se queira
volver a épocas pasadas onde solo podían ter saúde os que tiñan
diñeiro para pagar médicos e tratamentos, alude a casos de traer
medicamentos do estranxeiro e o sistema de saúde xeral implantado
polo Ministro de Sanidade Ernest Lluch que foi referencia mundial,
agora como non son capaces de privatizar hospitais van a privatizar
por áreas, están a volver atrás e depender da capacidade
económica; non entende as manifestacións de que non é novidade,
pagar 4,50 non pasa nada para vostedes pero é un fraude, os
pensionistas pagaron a súa pensión e teñen dereito a unha
prestación sanitaria, outra cousa é que se lle esixa máis aos que
están en activo, o tema é claro están cargando sobre as clases
máis desfavorecidas como si sobrasen as persoas.
A Sra. Pazos Bande fala da diferenza de
estar na oposición que cando se está no goberno, a pena é como
deixou o PSOE España e por iso hai que facer isto, dende a oposición
é fácil dicir cousas para quedar ben, critica que falen dos
pensionistas (intervén a Sra. García Pita e o Sr. Presidente
indícalle que é a segunda advertencia e a terceira se marcha),
considera que a súa alternativa é mellor e están a facer un gran
esforzo colectivo para non deixar morrer definitivamente o sistema
sanitario por culpa da mala xestión.
O Sr.Alcalde insiste no dito pola
portavoz popular e indica que hai que ter valor para vir con estas
cousas a pleno despois de como deixaron España ( intervén de novo a
Sra.García Pita e o Sr. Presidente ordénalle que se marche,
abandonando a sesión) prosegue o Sr.Alcalde manifestando por que non
trasladou isto ao Parlamento europeo, ao Parlamento de España, ao
Parlamento galego cando gobernaron e non o arranxaron.
Debatido o asunto, o Pleno da
Corporación con catro votos a favor dos membros do grupo AEC, do
concelleiro do PSdG-PSOE do grupo mixto, e do concelleiro D. Angel
Pena Fontenla, e cinco en contra dos membros do grupo popular, acorda
o rexeitamento da devandita moción.
PARTE DE CONTROL ÓRGANOS DA
CORPORACIÓN.
7.- INFORMES DA PRESIDENCIA.
a) Resolucións da Alcaldía. Dáse
conta das resolucións ditadas desde a número 346 do 23-09-2013 ata
a número 474 do 22-11-2013.
b) Informe sobre a execución
trimestral 3ºT/2013. Dáse conta da comunicación dos datos de
execución do orzamento no 3º T de 2013 remitida ao Ministerio de
Facenda e Administracións Públicas, Secretaría Xeral de
Coordinación Autonómica e Local, relativos ao Informe de Avaliación
do cumprimento de obxectivos Lei Orgánica 2/2012, que supoñen que o
orzamento desta Corporación non cumpre o obxectivo de estabilidade
orzamentaria e cumpre co obxectivo da regra de gasto.
c) Informe trimestral de acordo co art.
5 da Lei 15/2010 do 5 xullo pola que se establecen medidas de loita
contra a morosidade. De acordo co establecido no artigo 4 da Lei
15/2010, do 5 de xullo, de modificación da lei 3/2004, do 29 de
decembro, pola que se establecen medidas de loita contra a morosidade
nas operacións comerciais, preséntase o informe correspondente ao
3ºT de 2013 sobre o cumprimento dos prazos previstos nesta lei para
o pagamento das obrigas desta entidade local, incluíndo o número e
contía global das obrigas pendentes nas que se está incumprindo o
prazo, así como relación de facturas e/ou documentos xustificativos
con respecto ós cales transcorresen máis de tres meses dende a
anotación no rexistro de facturas sen tramitar os expedientes de
recoñecemento da obriga.
RENUNCIA O CARGO DE CONCELLEIRO. A
continuación toma a palabra o concelleiro D. Juan Antonio López
Rodriguez da candidatura Partido Popular (PP) para dar conta da
presentación da renuncia ó cargo de concelleiro desta Corporación
por motivos laborais e por non poder dedicarlle o tempo que require a
xestión das concellerías que leva, co obxecto que realicen os
trámites para substitución polo seguinte da lista que corresponda.
Indica que nas súas intervencións
procurou defender as ideas con intensidade pero con respecto cara as
persoas do outro lado da mesa, procurando non caer na descalificación
ou na ofensa, agradece ao resto do seu grupo político a dedicación,
honestidade e transparencia con que se fai o traballo no grupo e
sobre todo mostrar o seu apoio e admiración ao Sr.Alcalde pola
xestión que está a facer no desempeño do seu cargo.
Despois do uso da palabra polo
mencionado concelleiro, o pleno da Corporación por unanimidade
acorda tomar coñecemento da renuncia ó cargo do concelleiro de
D.Juan Antonio López Rodriguez e remitir certificación deste acordo
á Xunta Electoral Central para que expida credencial do seguinte da
lista que debe substituílo.
6. ROGOS E PREGUNTAS.
a) Preguntas orais.
a.1. Grupo AEC: Intervención do
portavoz D. Luis A. Fachal López.
a.1.1. As casetas que están
actualmente no paseo marítimo que son estacionais, está prevista
algunha data para retiralas?.
Resposta Sr.Alcalde: me imaxino que si,
teñen que sacalas.
a.1.2. Como están os trámites para
implantación dos pantaláns no Día Oito, hai algún avance?.
Resposta Sr.Alcalde: a pesar do
esforzo están como estaban, o compromiso está aí que si pero de
momento non avanzamos.
a.1.3. Hai algunha noticia ou algún
avance na humanización da N-651?.
Resposta Sr.Alcalde: hai algúns
avances, desde o Ministerio chamaron a Demarcación de Estradas para
que enviasen o proxecto e ver informes sobre a necesidade, estase a
mover a nivel de Madrid e haber si se da sacado, si hai emenda aos
orzamentos do Estado para sacalo para adiante, estase intentando que
a modificación sexa completa e non solo a primeira parte.
a.1.4. Queriamos saber si hai algunha
novidade na situación da execución das sentenzas do Penso?.
Resposta Sr.Alcalde: se está sacando
o prego e sacar a contratación, seguen as xestións coas entidades
financeiras.
a.1.5. En relación coas licenzas dos
chalets de Cardeita, hai que esperar polos outros ou como están?.
Resposta Sr.Alcalde: non, son licenzas
individuais, 4 xa están concedidas.
a.2. Intervención do concelleiro D.
Angel Pena Fontenla.
a.2.1. Desde o pleno de maio reclaman o
arranxo das fochancas do camiño do Pereiro, en maio porque chovía,
en xullo porque estaban rozando a herba, en setembro porque ían
asfaltar, estamos en decembro es a fochancas seguen aí, cando se
van amañar por fin esas fochancas?.
Resposta Sr. Alcalde: o camiño do
Pereiro está amañado, está asfaltado, si se refire ao camiño do
Pereiro de Abaixo estase a falar doutra cousa distinta.
O Sr. Pena Fontenla considera que hai
un solo camiño do Pereiro mentres que o Sr.Alcalde indícalle que
hai dous o de Arriba e o de Abaixo, producíndose debate sobre a
situación.
a.3. Intervención do concelleiro do
PSdG-PSOE D. Delfín Feal Pereira.
a.3.1. A final do mes de maio do 2013
presentouse unha solicitude por veciños de Soaserra e Regoela para a
colocación dunha marquesiña na parada do bus situada en Lavandeira,
sentido A Capela, como está o tema?, vaise colocar?.
Resposta Sr.Alcalde: recibiu a señor e
explicoulle a situación, non lle prometeu nada porque o tema está
complicado porque hai que conseguir unha marquesiña, pediulle datos
dos nenos e solo eran dous ou tres, estase buscando recursos, hai
solicitadas marquesiñas que se irán instalando por orde onde mais
nenos haxa, pero non pode dicir a data en que se vai a colocar.
a.3.2. Rogo. Que poña a funcionar a
calefacción na escola de música que morren de frio.
b) Preguntas por escrito.
b.1. Presentadas polos concelleiros
Dª.Mª. Teresa de Jesus García Pita e D. Angel Pena Fontenla, en
escrito de data 26 de novembro de 2013.
b.1.1. No Pleno de maio de 2013 a
Corporación aprobou unha moción para garantir información e máis
esixir a reposición da legalidade urbanística en San Lourenzo e ao
día de hoxe esta Corporación descoñece as xestións que se
realizaron a este respecto.
1º. Esixirlle á APLU que lle
achegue á Corporación municipal a documentación relativa ao
vertedoiro en terreo rústico de áridos bituminosos de Holanda.
2º. Esixirlle á Alcaldía de
Cabanas, ás consellerías competentes e á APLU o cumprimento
escrupuloso da legalidade urbanística
Con data 27 de setembro de 2013 a APLU
solicitou un informe de depósito de material asfáltico en Vilar do
Colo, cando ata a APLU sabe que no monte rústico denominado San
Lourenzo están cando menos tantas toneladas como verteu o Prestige
ao mar.
201200000002237 3104-OFICIO
APLU-AMB-2012-AXENCIA DE PROTECCIÓN DA LEGALIDADE (APLU) 6397
27/09/13 12:12 SOLICITANDO INFORME SOBRE DEPOSITO MATERIAL ASFALTICO
EN VILAR DO COLO URBANÍSTICA.
Cumpríronse e executáronse os acordos
do Pleno? Onde podemos consultar a documentación da APLU?.
Resposta Sr.Alcalde: A documentación
da APLU non hai problema, cando queira a solicita e lla deixamos
ver, é pública e non temos inconveniente ningún; o resto é un
tema xudicial que terá que determinalo o xuíz, a APLU pediunos un
informe técnico que se lle remitirá estes días e a partir de aí
será que decida.
b.1.2. Sobre as obras da estrada de
Porto a Laraxe, pregúntanos un veciño se esas beirarrúas van
enterrar os muros e as saídas das vivendas ata 70 cm, nalgúns
casos. Adaptaranse as beirarrúas para garantir a accesibilidade ás
vivendas?.
Resposta Sr.Alcalde: as beirarrúas van
cumprir a normativa de accesibilidade como require a lei, iso está
contemplado.
O Sr. Pena Fontenla insiste en que hai
queixas de sitios con bastante altura.
O Sr.Alcalde manifesta que ao Concello
non chegaron esas queixas, si esa persoa ten algún problema non ten
máis que dirixirse a dirección de obra ou ao Concello directamente.
b.1.3. Rogo. O día 19 do mes pasado as
20:30 tivo lugar un accidente no paso de peóns do Peón en Laraxe no
que se viron involucrados tres vehículos que chocaron en cadea por
non decatarse do paso de cebra, por sorte nesta ocasión non
atropelaron aos peóns que estaban a pique de cruzar por el, cousa
que si aconteceu noutras ocasións causando graves danos ás vítimas.
Polo que consideramos que este paso de peóns é un punto negro que
compre solucionar, por isto propoñémoslle ao goberno municipal que
solicite da Demarcación de Estradas a colocación de sinais
luminosos neste paso de peóns que permitan aos condutores velo
mellor e reducir deste xeito o perigo para veciños.
Resposta Sr.Alcalde: non hai
inconveniente en pedilo o tema é haber si hai onde colocar o sinal,
está limitada a velocidade a 50 pero si se pode mellorar a
seguridade solicitaráselle á Demarcación de Estradas.
b.2. Preguntas presentadas polo
concelleiro do PSdG-PSOE D. Delfín Feal Pereira en escrito de data
26 de novembro de 2013.
b.2.1. En relación á poboación do
Concello de Cabanas:
- Cal é o censo actual de habitantes?
- Temos estatísticas dos fluxos
migratorios de poboación, en concreto no rango de poboación activa
e por idades?, Cales son?.
Resposta Sr. Alcalde: a día de onte
3.338 habitantes. Cambio de pais no que vai de ano 2 persoas, baixas
por cambio a outros concellos 109, altas por cambio doutros concellos
128, altas por nacemento 13 e baixas por defunción 30.
b.2.2. En relación aos trámites de
inicio de alleamento dos bens inmobles pertencentes ao Concello de
Cabanas (Escola Laica e Nave industrial no Polígono de Vilar do
Colo):
- En que fase se encontran?.
- Trala aprobación do inicio dos
trámites houbo interese por parte de particulares ou empresas en
ditos bens?.
Resposta Sr. Alcalde: están non
trámites dos servizos urbanísticos do Concello para que fagan
informe e valoración, a partir de aí se fará publicidade. Non se
fixo publicidade sobre iso e non puido haber interese porque non se
sabe agás algún comentario de palabra, ninguén preguntou por eses
bens.
b.2.3. En relación ás políticas
activas de promoción do emprego:
- Poderíasenos explicar cales foron e
que resultados se están acadando?.
Resposta Sr.Alcalde: levouse a cabo o
programa nos concellos de Fene, Pontedeume, Neda, Mugardos e Cabanas
no ano 2012-2013, dentro dese programa había 14 persoas do concello
de Cabanas, logrouse colocar a 6, 5 delas cumpren os obxectivos dos
6 meses mínimo traballando e 1 non cumpriu aínda, estase a espera
de que cumpra, nese programa piden un 35% de inserción e cumpriuse,
ademais xente que non estaba dentro do programa por non cumprir os
requisitos se colocaron 7 persoas máis porque foron atendidos pola
persoa que levaba o programa; por outra b anda fíxose o plan de
cooperación da Xunta onde se contrataron 8 persoas, plans da
Deputación para limpeza de praias no verán 8 persoas e agora
empezaron a traballar 2 persoas máis a través da Deputación dentro
dun plan de emprego da propia Deputación.
b.2.4. En relación ás execucións das
reposicións das legalidades urbanísticas:
- No caso máis perentorio da execución
da sentenza sobre o edificio do Penso, e trala aprobación do inicio
de contratación dos traballos, volveuse a falar coa comunidade de
veciños afectados para explicar os seguintes pasos que se van a
facer e prazos de execución de sentenza?.
Resposta Sr.Alcalde: si se volveu a
falar con eles e estiveron outra vez reunidos, incluso viñeron cun
novo avogado para coñecer cousas, estamos a espera, explicóuselle
todo o proceso como era e que nos non podiamos parar xa o proceso,
son coñecedores do tema, o avogado púxose en contacto co noso
avogado e me pediron documentación que tiñamos e entregámoslla.
Nos demais casos denunciados (finca de
Suances, urbanización de Cardeita, ocupación de beirarrúas polo
ximnasio na zona da praia da Madalena), como se encontran ditos
expedientes de reposición?.
Resposta Sr.Alcalde: A finca de Suances
estase a resolver, a urbanización de Cardeita xa se regularizou a
situación de 4 licenzas e as beirarrúas do ximnasio estase pendente
de xuízo previsto para o día 11 de decembro porque foi aos
tribunais.
Non habendo mais
asuntos que tratar a Presidencia levanta a sesión sendo ás vinte
horas e cincuenta e cinco minutos, da cal levanto a presente acta e
como Secretario dou fe.
Vº e prace,
O Secretario.
O Alcalde,